KALIBO, Aklan – Ginaboebanta nga gaabot sa P70,000 pesos ro gin-aywan nga danyos it nag-eontad nga sunog sa Sitio Bantud, Barangay Manocmanoc sa isla ng Boracay.
Sa interview it Bombo Radyo Kalibo kay FO3 John Henry Ildesa, imbestigador it Bureau of Fire Protection (BFP) Boracay, ginpahaya kara nga pasado alas 12:05 it udtro-adlaw kat makabaton sanda it report nga may nagakatabu nga sunog sa nasambitan nga lugar.
Insigida nanda raya nga ginrespondehan kung siin haeos 250 metros eamang ro distansiya kara maghalin sa andang istasyon apang mabahoe eon ro kaeayo kat mag-abot sanda sa lugar tuga it madasig nga nag-eapta ro kaeayu bangod himo eamang ro mga baeay sa light materials.
Mag-eowas sa BFP-Boracay, nagbulig sa pagtapna it kaeayu ro iba pang mga force multipliers, volunteer groups ag mga residente nga nagpatigayon it bucket brigade.
Samtang, naga guwa sa imbestigasyon it BFP-Boracay nga naghalin ro kaeayo sa panimaeay ni Mrs. Angeline Roda, 39-anyos kung siin nasayuran nga mga menor de edad eamang ro una sa baeay kat matabo ro sunog.
Kaangot kara, ginpahayag ni Ildesa nga bukon it kuryente ukon mga naaywanang mga nakasaksak ukon nakabukas nga appliances ro gin-umpisahan it kaeayo bangod sa bilog nga adlaw nga brown-out sa isla.
Sa makaron hay nagapadayon pa ro imbestigasyon it BFP-Boracay sa insidente.
