KALIBO, Aklan — Ginserbihan it warrant of arrest ro sangka eaeaki nga nauna eon nga nagsurender ag ginkasuhan bangud sa brutal nga pagpatay sa sangka negosyante sa Crossing Buswang, Poblacion Kalibo ko nagtaliwan nga Enero 6, 2024.
Gin-aresto kahapon it Lunes, Agosto 5 it mga tawuhan it Kalibo Municipal Police Station si Arnold Recente, 25, sangka laborer ag residente it Brgy. Navitas, Malinao.
Ro pag-aresto hay pinaagi sa warrant of arrest sa kasong murder ag owa it gintaeana nga piyansa para sa anang temporaryong kahilwayan.
Si Recente hay nagsurender ko buean it Pebrero, apang ginpahilway matapos nga mag-eampas sa reglementary period.
Madumduman nga naging mabahoe nga balita ro pagpatay sa 49-anyos nga si Marissa Gamutan Flores matapos nga nagtanyag sanday Senator Raffy Tulfo ag Kalibo mayor Juris Sucro it kabilugan nga P100,000 para sa makatau it impormasyon nga naging daean sa pagsurender it suspek ag kaibahan kara nga 18-anyos nga driver it motorsiklo nga gingamit nga get-away vehicle.
Nauna eon nga ginsaysay it suspek nga bandang alas-11:40 it gabi-i it Enero 6 pagkatapos nga ginbalik ro bote it aeak hay nagbakae pa raya it sigarilyo ag naghueam it lighter, apang nakaangkon sigon sanda it banggi-anay it biktima.
Kasunod kara hay ginsueod nana si Flores sa anang baraka, ag sa sobrang kaakig hay gin-buno it makapilang beses nga naging rason it anang hinali nga kamatayon.
