Gin-aresto it mga Vatican police ro sangka American tourist matapos kara nga basagon ro daywang 2000 year old ancient Roman statue.
Nahimo raya it suspek bangud sa pagreklamo nga owa imaw ginpasugtan nga maka-istorya si Pope Francis.
Ro owa ginpangaeanan nga turista hay una sa Chiaramonti Museum kat mag-request raya nga gusto nana nga maka-istorya ro santo papa.
Kat owa imaw ginpasugtan sa anang hinyu, ginbo-oe kara ro sangka antigo nga marble bust nga nakadispley sa museum ag ginpilak raya sa saeog.
Ginhana nga magpaeagiw it turista matapos imaw nga eagson it mga museum staff.
Bangud sa anang pagdaeagan halin sa naga-eagas nga awtoridad, nakabasag eon man imaw it sambilog pang estatwa.
Sa bulig it mga Vatican police, gin-aresto ag ginkulong ro suspek.
Suno sa spokesperson it Vatican nga si Matteo Bruni, minor damage eamang ro naangkon it mga estatwa.
Ro sambilog sa mga raya hay nabasag ro ilong ag ginpaidaeum raya sa restoration agud nga ma-display it uman sa museum.
Bangud sa nasambit nga insidente, magabutang eon it “complex and sophisticated” video surveillance system sa Chiaramonti Gallery.
Mag-eowas kara, magapatigayon man it seminar sa mga museum staff agud nga tur-an sanda kon paalin nga makipag-communicate sa mga nagawala nga museum visitors.
Ro Chiaramonti Museum hay ginpatindog kato sa pagdumaea ni Pope Pius VII Chiaramonti.
Sa nasambit nga museo makit-an ro 1,000 busts, statues ag sarcophagi.
Sa makaron hay sa kustodiya ro suspek samtang ginasuma pa kon pila ro multa nga dapat kara nga bayaran antes nga pabalikon sa andang nasyon.
