KALIBO, Aklan—Emosyunal nga ginsaysay sa Bombo Radyo it sangka ungang babaye ro mga inagyan it anang ama kasunod it selebrasyon it fathers day makarun nga adlaw June 21,2020.
Gintawag nga “simple but the best tatay” ni Bhessy Dela Cruz , unga it ginakabig nga pinakamagueang nga myembro it Kalibo Auxillary Police (KAP) nga si Mansueto Dela Cruz , 74 anyos ag tumandok it C. Lazerna Street Kalibo.
Ginpahayag dugang nga hasta nga sanda hay gintubuan it boot owa gid raya it nabatian nga nagreklamo ro andang ama.
Maskin pa nga may edad eun hay padayun pang nagatrabaho sa tunga it daeanon ag ginasoeay ro init ag uean para eamang masupurtahan ro pangadlaw-adlaw nga kinahangeanon it pamilya.
Sa kamatuoran suno pa kana hay nakaangkon eun makarun it deperensiya sa anang pandinig ro andang tatay bangud sa sobrang pagtrabaho.
Sa tunga man it ginapangatubang nga krisis makarun it nasyon bangud sa coronavirus disease ukon covid-19 hay padayun nga nagatrabaho raya bilang tagabantay sa daeanon.
Sa makarun hay ginapapundo eun sigon it Local Government Unit (LGU-Kalibo) si tatay Mansueto sa anang pagtrabaho bangud sa anang edad.
Ginkasubo man sigon nanda bangud nga haeos matangis raya sa anang pag-eungkat sa trabaho. Makarun nga adlaw it Fathers day hay nagpreparar sanda it simple nga selebrasyon para sa andang ama.
