Nagapabilin nga nakabantay ro US sa nagakatabo nga pagpauean it Iran it mga missiles sa Israel.
Kaibahan ni US President Joe Biden si Vice President Kamala Harris para makabueo it impormasyon sa pinaka’ulihing sitwasyon sa Israel.
Pahayag man ni White House National Security Council Advisor Jake Sullivan nga ginabuligan nanda ro Israeli military para patumbahon ro mga missiles it Iran.
Ginsugo abi ni Biden ro paggamit it US naval destroyers nga magabulig sa Israeli air-defense units.
Indi magnaba sa 200 missiles ro ginpauean it Iran sa Israel.
Una eun nga ginpahayag it Islamic Revolutionary Guard Corps (IRGC) it Iran nga ro missile attacks hay bilang pagbaeos sa mga namatay nga tawo sa Gaza ag Lebanon pati man ro pagpatay kay Hezbollah chief Hassan Nasrallah ag IRGC commander Abbas Nilforoushan.
Suno man kay Pentagon press secretary Brig. General Patrick Ryder nga padayon ro andang ginahimo pagbantay sa sitwasyon sa Israel.
Hasta makaron hay uwa pa it katuyuan ro US nga maghimo it evacuation it mga pumueoyo it US nga una sa Israel.
