Indi magapasakop ro pilang transport group sa probinsiya it Aklan sa ginakasa nga nationwide strike nga pagapamunuan it grupong Manibela sa Oktubre 16 raya ro ginpahayag ni Edgar Igcasenza, Chairman it Malinao-Lezo Transport Cooperative ukon MLTC.
Ro untat-biyahe hay tuga it gina alegar nga korapsyon sa pag-apruba it prangkisa para sa public utility vehicles (PUVs) ag ro hirit nga pagpataas it pamasahe kun sa siin ro gin aprubahan eamang hay ro piso nga provisional fare hike para sa mga PUJs nga naging epektibo ko Oktubre 8.
Ginpaathag pa ni Igcasenza nga umpisa nga nagseparar sanda sa grupong Piston hay owa eon sanda nagapasakop sa anuman nga mga transportation strike, apang hilway sigon ro tanan nga magpasakop kon sin-o ro may gusto.
Sa pihak nga parte, ginpatuman eon sigon it MLTC ro dugang nga piso nga pamasahe sa mga short distances.
Padumdom man nana nga sa point to point hay uwa nagbag-o ro pamasahe.
Pasalig man ni Igcasenza nga kung may mga drayber nga gapanukot it bukon it tama ukon may iba pang problema hay haum sigon ro andang opisina para sa mga kaklaruhan.
Indi sigon malikawan nga may mga bentahosong driver.
Sa pihak nga parte, ginpaabot pa nana nga ro pinaka-ulihi nga oil price rollback hay medyu indi pa sigon nanda mabatyagan.
Sanda sigon sa transport sector ro pinaka apektado sa kada nagapatuman it pagsaka sa presyo it produktong petrolyo.
Gapasaeamat man imaw sa mga ayuda para sa mga operators ag drivers bago mag December.
Padumdom nana nga hilway mat’a ro ibang grupo sa pagpakita it andang baeatyagon para maipaabot ro andang kinahang-ean.
Ginsiguro man nana nga masuporta, marekomenda ukon mamati man imaw sa problema angot sa PUV modernization.
