Vikings Tribe magabawi sa masunod nga dag-on; tanan nga kadaeag-an gina-offer kay   Sto. Niño

KALIBO, Aklan — Mag-eowas sa pagiging  2^nd placer sa  street dancing competition sa Tribal Big Category sa bag-o eamang natapos nga Kalibo Sto. Nino Ati-Atihan festival 2025,  ginpasaeamatan man it pamunuan it Vikings Tribe it Brgy. Dumga, Makato ro masadya ag maayos nga selebrasyon .

Suno kay Mr. Hark Tesorero, tribe manager nga kada nagapasakop sa festival hay owa sanda masyadong naga-expect nga magadaog.

Nagapasakop sigon sanda para sa andang sadsad panaad ag bukon it para sa kompetisyon.

Ro andang mindset suno kana para sa andang mga dancers  hay magsadsad nga halin sa tagipusuon .

Sa makaron nga dag-on ro andang tribu hay may una nga 72 nga mga dancers ag 50 nga drummers.

Kapareho ko 2024 nga Ati Atihan festival hay 2^nd place man sanda ag nagbaton it cash prize nga P170,000.

Ginpahayag dugang nga sambilog eamang ro judge para kanda ag owa it iba kundi si Señor Sto. Niño kun sa siin ginahaead nanda ro andang pagpasakop kada dag-on sa banwa it Makato ag Kalibo.

Nasayuran nga ro Vikings ro kauna-unahan nga tribu nga nakaangkon it grand prize nga P1-milyon ko 2023.