KALIBO, Aklan—Gin-imbitahan si vice president Sara Duterte-Carpio ag iba pang mga celebrities sa showbiz industry sa pagahiwaton nga Opening Salvo it Kalibo Ati-atihan Festival 2023 sa maabot nga Oktubre 8.
Suno kay barangay kagawad Mark Sy it Poblacion, Kalibo ag tagapaghambae ni Kalibo mayor Juris Sucro nga all set and ready eon ro lokal nga gobyerno it Kalibo para sa nasambit nga event.
Pagkatapos it State of the Municipality Address ukon (SOMA) ni Mayor Sucro nga paga-umpisahan bandang alas-5:00 it hapon hay ro deklarasyon it opening salvo ukon pormal nga pag-umpisa it mga kasadyahan para sa ginakabig nga “Mother of All Philippine Festivals” sa Enero.
Apang pag-abot it alas-8:00 it gabi-i hay igabawae anay ro pagsadsad sa palibot it Kalibo pastrana park agud nga taw-an it daean ro free concert kun sa siin kaibahan sa mga magapasundayag ro lead vocalist it Callalily nga si Kian Cipriano kaibahan ro mga artistang sanday Xian Oquendo ag Bianca Umali.
Samtang, igapakita man suno kana ro bag-ong itsura it plaza sa nasambit nga event.
Maabu pa suno kana nga paga-abangan ro publiko sa Opening Salvo kaibahan ro car and motor show, food fest, zumba, national dance contest, foam party ag iba pa.
Ginpasiguro pa nga ro okasyon hay bukas para sa tanan nga mga gustong magpasakop eabi eon ro mga grupo ag tribu bangud nga gusto ni mayor Sucro nga maging magarbo ag makolor ro selebrasyon.
