KALIBO, Aklan — Naga kaagnas eon kat masapwan ro waeong dag-un nga ungang babaye kahapon it agahon nga naga hamyangon sa kataeunan nga porsyon it Brgy. Guadalupe, Libacao.
Ro biktima hay gin kilaea kay Chrisha Nobleza, sangka Grade 3 pupil ag residente it Brgy. Julita, Libacao.
Suno kay Police Chief Inspector Ulysses Ortiz, hepe it Scene of the Crime Operatives ukon SOCO Aklan, nga sa pagpadueong nanda sa crime scene nakita kara ro naga einapta nga eambong it biktima ag naggowa eon ro anang toe-an matapos nga mapaeos ro waea nga parte it anang alima kamana man nga bueag eon ro anang ueo sa eawas.
Natigayun sigon nga madiskubrehan ro bangkay it biktima matapos it mabaho nga hugom rason nga gin inusoy raya it mga residente.
Angot kara, gin rekomendar man ni Ortiz nga ipaidaeum sa autopsy examination ro bangkay it biktima agud ma-determina ro gin tunaan kara it kamatayun kamana man agud makumpirma ro espekulasyon nga nagagowa nga gin himuslan raya antes nga gin patay.
Gin hayag man kara nga base sa indikasyon it mga pak-eang ag eu-o nga mga dahon nga gin tabon sa biktima, gin hana pa sigon it owa pa nakilaeang suspect nga sunugon raya.
Gina kabig man ni Ortiz nga sangka “demonyo” ro naghimo it makarondaya ka-brutal sa unga kamana man nga hugot karang gina kondina ro makangieidlis nga insidente.
Nasayuran nga kapin sa tatlong adlaw eon nga gina inusoy it anang pamilya ro biktima matapos nga maduea ku adlaw it Martes.
Base sa report, Martes it agahon kat ulihing nakita ro biktima nga naga harvest it manami maeapit sa suba.
Gin sugo sigon raya it anang mga kaibahan nga mag uli agud magtug-on apang, owa eon nakabalik.
Gina patihan nga gin himuslan ro unga antes nga ginpatay kamana man nga gin hanang sug-an ro anang bangkay.
Nasayuran nga sangka honor pupil ro biktima ag panganay sa limang magmaeanghod.
Sa makaron hay padayun pang gina imbestigahan it kapulisan ro nasambitan nga insidente.
