KALIBO, Aklan—Una eon sa mayad nga kahimtangan ro 10 nga katawo matapos nga ma-trap it haeos pilang minutos sa sueod it tumirik nga elevator it sangka hotel sa Brgy. Balabag sa isla it Boracay.
Ginasugid nga owa man naninahan ag puro una sa maayos nga kondisyon ro mga biktima nga owa eon ginpangaeanan pa it mga otoridad mag-eowas sa sangka babaye nga medyu na-suffocate.
Sa imbestigasyon it Bureau of Fire Protection ukon BFP-Boracay substation, natabu ro insidente sa ikatlong panaeagan it 5-storey building nga hotel.
Ginasugid nga samtang sakay it elevator ro mga biktima kat gulping nag-brown-out rason nga nagka-aberya ro ginasakyan nga elevator.
Sa mayad nga swerte ag nakapangayo eagi it bulig ro mga biktima rason nga narespondehan it mga otoridad.
Nagbutang it maisot nga guhang ro mga katapo it BFP gamit ro wasay, kahoy , hydraulic shock ag iba pang gamit agud nga makasueod ro hangin ag indi ma-suffocate ro mga tawo sa sueod.
Hasta nga ko ulihi hay madinaeag-on nga nabuksan ro pwertahan it elevator ag nakasueod ro mas maabu pa nga hangin sa sueod.
Inabot man it pilang minutos ro rescue operation ag natigayon nga mapaguwa ro mga biktima.
Sambilog sa mga raya hay gindaea it mga katapo it MDRRMO-Malay sa sangka ospital matapos nga nabudlayan nga maka-ginhawa.
Ginapatihan nga posibleng overloading ro rason it pagka-aberya it elevator.
Angot kara, ginlaygayan it BFP ro publiko nga indi magdueutdutan sa elevator ag maghueat eon lang nga makasakay sa masunod.
Engkaso nga ma-trap sa sueod it elevator, maging kalmado indi mag-panik ag sa baylo hay insigidang magpangayo it bulig.
Pwede man sigon nga gamiton ro emergency signal it elevator ukon magtawag sa mga emergency hotline number.
Dapat man nga maging kalmado ag magpaeayo sa pwertahan it elevator hasta nga owa pa naka-abot ro bulig.
