KALIBO, Aklan—Haom eun ro kapin sa 880 ka mga trained census field workers agud magpangatok sa kada panimaeay para sa 2020 Census of Population and Housing (CPH) umpisa sa Setyembre 1.
Suno kay Peter Mangilog, Statistician II it Philippine Statistics Authority ukon PSA Aklan, base sa Republic Act No. 10625 ukon mas kilaea bilang Philippine Statistical Act of 2013 and Executive Order No. 352 ginamanduan ro PSA nga magpreparar sa pagahiwaton nga national census ag statistical activities.
Ro nasambitan nga 2020 CPH hay magatao it daean sa gobyerno para makahimo it aksyon, plano ag programa.
Base ko dag-on 2015 nga census data, ro populasyon sa probinsya it Aklan hay kapin sa 574,823.
Kapin man sa 14% it populasyon hay naga-istar sa banwa it Kalibo, ginsundan it Malay nga may 9.2%, Ibajay (8.6%), New Washington (7.8%) ag Banga nga may 6.9%.
Sa tanan nga mga munisipalidad sa probinsya it Aklan, ro Kalibo ro nakalista it mataas nga populasyon nga nagaabot sa 80,605 ka mga indibidwal.
