KALIBO, Aklan — Nagahimas makaron it maeamig nga rehas ro sangka 37 anyos nga eaeaki bangud sa patong-patong nga bayolasyon.
Base sa panaysayon ni Kalibo Auxillary Police (KAP) member Te Tibobos, gin-apprehend na ro kasunod kara nga motorsiklo nga ginamaneho ni Rodel Barsubia, 37 anyos, residente it barangay Naisud, Ibajay bangod sa illegal muffler.
Sa pagpundo sigon nanda hay uwa man it maipakita nga lisensiya ro nasambitang driver.
Ginhambaean na sigon raya it anang bayolasyon apang sa baylo hay nagbuoe it kwarta nga P100 ro driver ag ginbutang sa buesa it anang uniporme.
Suno kay KAP Tibobos, nagtao raya kana it kahuy-anan bangud maabo nga tawo ro nakakita.
Insigida na raya nga gintawgan it police assistance ag gindakop ro nasambitang driver it motorsiklo.
Nakadetine makaron si Barsubia sa lock up cell it Kalibo Municipal Police Station para sa nagakaigo nga disposisyon.
