KALIBO, Aklan—Limang baeay ro gin-eamon it kaeayo sa natabu nga sunog, bandang alas-4:30, aga-aga it Lunes, Mayo 13, maeapit sa Cargo Port sa Barangay Manocmanoc sa Isla it Boracay.
Suno kay FO1 Rex Natabio it Bureau of Fire Protection ukon BFP-Boracay sa mga nasunog nga baeay, daywa ro naugdaw ag tatlong iba pa ro partially burned nga puro magkaeapit-baeay sa nasambit nga lugar.
Nadaeahig man sa sunog ro sangka barangay outpost.
Base sa report, nakita eon lang it mga residente nga nag-umpisa ro sunog sa sangka baeay ag bangud nga madasig ro pagkalhit it kaeayo hay nadaeahig sa sunog ro ap-at nga iba pang kabaeayan sa nasambit nga lugar.
Makataliwan ro haeos sang oras hay natapna ro sunog ag bandang alas-6:17 it agahon kat gindeklarang fire out.
Owa man it may nailistang nadisgrasya sa natabu nga insidente.
Sa makaron hay ginatumod pa it mga arson investigator ro rason it sunog, apang ginaboeobanta nga naga-abot sa P710,000 pesos ro haega it nahalitan it kaeayo.
Nauna kara, sangka 2-storey residential house nga himo sa light materials man ro nasunog ko nagtaliwan nga Mayo 11 bandang alas-11:30 it agahon sa Sitio Tulubhan sa nasambit man nga barangay.
Raya hay ginapanag-iyahan ni Mr. Francisco Bandiola.
Masobra sa 52,500 ro kantidad it propiyedad ro naugdaw it kaeayo samtang nagapadayun pa ro imbestigasyon it Bureau of Fire Protection ukon BFP Boracay sa rason it sunog.
Angot kara, bangud sa sunud-sunod nga mga insidente it sunog, uman nga nagpadumdum ro BFP nga mag-dahan ukon likawan nga maghimo it mga rason sa pag-angkon it sunog eabi eon makaron nga grabe ro init it tiempo kun sa siin mabahoe ro posibilidad sa pagtuhaw it sunog.
