KALIBO, Aklan — Magkahalong kaakig ag pagkanugon ro nabatyagan it sangka 70-anyos nga lola matapos nga mabiktima it “Salisi Gang” bandang alas-6:30 it agahon it Biyernes, Agosto 2 sa anang baraka sa Brgy. Tigayon, Kalibo.
Ro biktima hay ginkilaea it pulisya nga si Laura Resco, 70-anyos, sangka negosyante ag residente it nasambit nga lugar.
Base sa report, nagbakae kana it tunga sa kaha nga sigarilyo ro suspek kabaylo it P1,000 nga kwarta ag kat ana eon kunta raya nga pagasinsilyuhan hay nagpahayag nga magadugang it pagabak-eon.
Apang sa anang pagbalik sa suspek nga nagpakuno-kuno nga customer, nataeupangdan nga owa eon ro anang sling bag nga nakatungtong sa estante nga may sueod nga tinipunan nana nga kwarta nga nagabalor it kapin sa P5,000.
Dismayado sigon imaw bangud nga ro kwarta hay nakataeana kunta sa pagpa-check-up it anang apo.
Bangud kara, insigida nga nag-report sa Kalibo Municipal Police Station ro biktima ag sa pag-usisa it mga awtoridad, mabahoe sigon ro posibilidad nga nabiktima ro lola it “Salisi Gang”.
Suno sa pilang mga nakasaksi nga ro suspek nga nakasuksok it jacket hay dayun nga nagsakay sa naka-abang nga motorsiklo nga gingamit nga get-away vehicle.
Nagapadayun pa ro imbestigasyon it kapulisan sa insidente ag manhunt operation sa mga suspek.
