KALIBO, Aklan — Gina-imbestigahan eon it kapulisan ro siyam nga naaresto nga ginapatihan nga miyembro it “Salisi Gang” nga ginaturo nga responsabli sa nagakatabu nga panakawan sa pilang mga negosyante sa Barangay Poblacion sa banwa it Altavas.
Suno kay P/Capt. Ryan Batadlan , hepe it Altavas Municipal Police Station nga sangka negosyante ro nagdangop sa andang estasyon, agahon it Huwebes, Setyembre 5 ag ginreklamo ro pagkaduea it anang kapin sa P20,000 nga cash nga nakasueod sa anang bag sa sueod it andang stall sa tindahan it Altavas.
Sa pagtugis it kapulisan sa bulig it mga residente ag barangay tanod, naispatan ro mga suspek sakay it sangka saeakyan nga gina-alegar nga gin rentahan it grupo nga halin sa Luzon ag nagapaeagiw eon kunta paagto sa direksyon it boundary it Altavas ag Capiz.
Nagsakay ro pito sa RoRo bus nga may biyaheng Cubao, apang natigayon nga mabaeabagan sa may Altavas Municipal Cemetery.
Naaywan sa andang get-away vehicle ro driver ag sambilog pa nanda nga kaibahan .
Sa pag-review sa CCTV, nakilaea ro pila sa mga suspek nga nagapatigayon it pagpanakaw.
Ginpahayag ni P/Capt. Batadlan nga pila sa mga grupo hay nagapakuno-kuno nga customer ag ginadisturbo ro tag-aga ag helper hasta nga ro sambilog kanda hay makapaeapit sa kaha agud nga mabo-oe ro kwarta.
Nagagamit man sigon ro grupo it peke nga mga kwarta sa pila sa andang operasyon.
Nasayuran nga naging sunud-sunod ro theft incident sa Altavas public market ag sa iba pang mga banwa.
Narekober sa bag it mga suspek ro mga kwarta, cellphone, alahas ag iba pang mga items nga ginapatihan nga puro tinakawan.
Samtang, matapos nga maaresto, pila sa mga suspek hay nagapakuno-kuno nga apa ag naga “sign language” agud nga indi makatau it impormasyon.
Owa man it ID nga ginpresentar ro mga suspek nga ginaeakipan it ap-at nga eaeaki ag limang babaye.
Ginatun-an pa ro kasong igapasaka kontra sa mga suspek kadungan ro pag-engganyo sa iba pang nabiktima it grupo nga magguwa agud nga mas pang magabaskog ro andang kaso.
