KALIBO, AKLAN — Naga pangatubang sa kaso ro sangka 69-anyos nga eaeaki matapos nga barilon ro 25-anyos nga soltero nga naka-alitan sa Brgy. Navitas, Numancia, Aklan.
Gina patihan nga grabeng kaakig ro nagtueod sa suspek nga si Eduardo Reyes, alyas Dante, agud barilon gamit ro 12-gauge shot gun ro biktimang si Meljon Laurente, parehong residente it nasambitang lugar.
Si Laurente hay nakaangkon it nina sa tiyan ag waea nga pa-a nga insigidang gin padangat sa Aklan Provincial Hospital.
Sa imbestigasyon it kapulisan, masami sigon nga gina bully it biktima ro suspek ag gina sunlog nga bungal kamana man nga gina samad ro anang pananum sa gowa it panimaeay nga anang gina bantayan.
Sa basketball court sigon si Laurente kat binaril raya it suspek nga insigidang nagpanago sa sueod it andang baeay.
Haeos tatlong oras man nga nagbuhay ro negosasyon ag pinalibutan eon it kapulisan ro andang baeay bago napa-surrender ro suspek it sangka dating retiradong pulis.
Owa man narekober ro baril nga ginagamit nga gina sugid nga gin pilak it
suspek.
Sa makaron hay naga pabilin sa Numancia Police Station ro suspek ag posibling maga pangatubang it kasong frustrated homicide ukon frustrated murder.
