KALIBO, Aklan — Mas pang ginhugtan it Kalibo Police Station ro implementasyon it curfew ordinance sa banwa it Kalibo umpisa alas-10:00 it gabi-i hasta alas-4:00 it aga-aga agud nga maprotektahan ro mga pamatan-on kontra sa mga maeain nga elemento ag mailikaw sanda sa paghimo it kaeainan.
Sa idaeaum it ordinansa, bawae ro mga menor-de-edad nga magwinarang sa mga kalye ukon pampublikong lugar sa dis-oras it gabi-i.
Instriktong ginapatuman makaron ro curfew ordinance agud nga malikawan ro anuman nga krimen nga gina eakutan it mga pamatan-on eabi eon sa gabi-i.
Ginalibot man it mga otoridad ro mga computer shops nga kaeabanan nga gina-tambayan it mga pamatan-on.
Ko nagtaliwan nga mga inadlaw hay naging sunod-sunod ro mga insidente it paeanakawan nga ginaeakutan it mga pamatan-on.
Indi man makulong ro mga menor-de-edad bangud sa naga-eksister nga Juvenile Justice Law.
Mag-eowas kara, dere-deretso man ro ginahimo it Kalibo Police Station nga Oplan Sita, Oplan Bakal sa tanan nga mga videoke ag KTV bars agud nga maaresto ro mga nagadaea it mga hinganiban ag bukon it lisensiyadong baril sa tuyo nga masiguro ro kaayusan ag kalinong sa bilog nga banwa it Kalibo.
