KALIBO, Aklan — Haeos 70 porsiyento eon nga tapos ro construction it main road sa Isla it Boracay.
Raya ro ginpahayag ni Department of Public Works and Highways (DPWH) Secretary Mark Villar sa uman nga pag-inspection kara sa isla ko nagtaliwan nga Huwebes sa nagapadayon nga rehabilitation works.
Suno sa sekretaryo, igapatuman kara ro one-way traffic scheme sa soft opening it Isla sa Oktubre 26 sa circumferential road halin sa Cagban Port paadto it Elizalde Compound sa Station 1 sa nasambitang isla.
Dugang pa kara nga haeos 83 porsyento it mga tubo para sa bag-ong drainage system sa Isla hay nai-install eon samtang patapos eon man sigon ro mga sidewalks.
Sa makaron hay gin-abisuhan ni Secretary Villar ro mga turista nga pagkatapos it soft opening hay magapadayon ro andang trabaho sa karsada kon siin 24/7 sandang magatrabaho agud mas mapadasig pa raya.
Sa pihak nga parte, kumpiyansa ro DPWH nga ma-kompleto nanda ro magtimbang nga linya it main road antes matapos ro presenteng dag-on.
