KALIBO, Aklan — Uman nga nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka dating preso matapos nga madakpan sa buy-bust operation sa Brgy. Bulwang, Numancia, Huwebes it aga-aga.
Naaresto ro suspek nga si Joseph Franco Ticar, alyas Otip, 34, residente it L. Barrios St. Kalibo matapos nga mabo-oe it mga otoridad ro 2 sachet it ginadudahan nga shabu sa balor nga P5,000 sa andang transaksyon sa nasambit nga lugar.
Ro operasyon hay pinaagi sa gintingub nga pwersa it Aklan Provincial Drug Enforcement Unit (PDEU), Numancia municipal police stations ag Aklan Highway Patrol Group.
Madumduman nga nauna eon nga naaresto si Ticar sa pagduso it iligal nga droga, apang nakahilway matapos nga magsueod sa plea bargaining agreement ko 2018.
Ginpahayag ni Police Major Frensy Andrade, hepe it PDEU nga naging mabuhay ro andang surveillance sa suspek bangud nga madahan raya sa pakikipag-transaksyon sa mga nagabakae kana it shabu.
