KALIBO, Aklan — Patay ro sangka eaeaki matapos nga eab-on it haeos makalimang beses it anang kainuman sa Brgy. Guanco, Balete.
Base sa report it Balete Police Station, masadya pa nga naga-inuman ro biktimang si Ronnie Sarandin, 48, residente it nasambit nga lugar kaibahan ro suspek nga si Robert dela Cruz, 27, sa panimaeay it andang kasimaryo nga si Randy Cuadrante bandang 6:00, Huwebes it gabi-i.
Apang kat nagapa-uli eon ro daywa hay gina-alegar nga nakaangkon it mainitan nga diskusyon sa indi masayuran nga kabangdanan.
Sa pagbalik sigon it suspek sa baeay ni Cuadrante hay nagasinggitan raya nga daehon imaw sa estasyon it pulisya bitbit ro anang sanduko nga puno it dugo.
Bangud sa nakita, nagpanarado sigon it anang baeay si Cuadrante sa pagkabaeaka nga pati imaw hay maeabu.
Boluntrayong nagsurrender sa andang barangay kapitan si dela Cruz nga imaw ro nagdaea sa Balete PNP.
Owa eon nadaea sa ospital ro biktima bangud nga insigida raya nga namatay sa gin-eontaran it insidente.
Suno sa suspek nga matsa gulpi eamang imaw nga naduea sa anang paminsaron ag owa napan-uhan nga gin-einabo eon kara ro anang kainuman.
Kasong homicide ro posibleng paga-atubangon it suspek.
