KALIBO, Aklan—Agud nga eubusang malimitahan ro mass gatherings sa Brgy. Poblacion, Kalibo hay nagbaeay it ordinansa ro mga opisyal nga gin-author ni kagawad Mark Sy.
Suno kay Punong Brgy. Neil Candelario, ro nasambit nga tikang hay kasunod sa andang nagapadayon nga monitoring ag pag-istudyo kon sa siin sa 34 nga aktibong kaso it deadly virus nga may una sa makaron sa Poblacion, kaeabanan kara hay naghalin sa mass gatherings.
Ro draft ordinance number 03 series of 2021 ukon an ordinance institutionalizing the health protocols and guidelines in holding mass gatherings amidst the 2019 coronavirus disease ukon covid-19 pandemic in brgy. Poblacion, kalibo hay tuyo nga maminimize ro pagpatigayon it mass gatherings agud nga malikawan ro pag-inabo it kaso it deadly virus.
Ro nasambit nga draft ordinance hay magaagi pa sa deliberasyon it sangguniang bayan it Kalibo kon sa siin engkaso nga maaprubahan ag maipasa hay pagatawgon raya nga Covid-19 Mass Gathering Ordinance.
Sa oras nga maipatuman raya hay may kaakibat nga P1,000 pesos nga penalidad sa kada violator.
Nasayuran nga ro banwa it Kalibo hay ro sentro it komersyo kon sa siin may bukas eon man nga mga leisure establishment sa idaeom it modified general community quarantine
