(Update) KALIBO, Aklan—Mabahoe ro pagpati it mga residente sa Barangay Pagsanjan, Banga nga bukon it residente sa andang lugar ro nag-eubong it daywang ka mga bungo nga nakasueod sa daywang magkaseparadong balde nga may takop maeapit sa sangka suba it nasambitan nga lugar.
Suno kay Jeffery Natalio, residente it nasambitan nga lugar ag imaw man ro nakakita it mga bungo nga posibleng gindaea eamang sa andang barangay ro nasambitan nga mga bungo agud nga idto maieubong.
Ginhungod man sigon ro paghimo kara bangud nga ginkutkutan it madaeum sa eugta.
Ginasugid nga ro mga bungo hay magkaiping nga naka-eubong.
Ginapatihan nga bag-o pa eamang raya sa lugar bangud nga naga-hugum pa kat makit-an ukon una pa sa state of decomposition.
Puro bungo eamang ro nakita ag owa ro eawas ukon kalansay.
Ro bungo hay ginapanag iyahan it sangka adult ag sangka unga bangud sa andang magkaiba nga size.
Suno kay Natalio nga samtang naga-usoy it tuway sa pangpang hay may natapakan imaw nga sangka balde rason nga anang ginhaw-as.
Sa pagbukas hay nakibot imaw kat makita ro mga bungo rason nga insigida ginpahisayod sa andang barangay kapitan nga nag-report man sa Banga Municipal Police Station.
Ginhinyu man it Banga PNP nga magdangop kanda kon sin-o man ro naduea-an nga miyembro it pamilya.
Sa makaron hay nagapadayun ro imbestigasyon it kapulisan sa insidente kamana man ro pagtumod kon anyo ro bungo nga nakita.
Sa pihak nga parte, nagapabilin man makarun nga blangko ro mga opisyal it barangay kun sa siin maghalin ro nakit-an nga daywang ka mga bungo.
Raya hay bangud nga owa sigon sanda it may nabaton nga report ukon reklamo nga may tawo nga naduea sa andang lugar ukon kaiping nga barangay ukon banwa.
Suno kay Barangay Kapitan Florido Rubrico, posibleng ro mga bungo hay maghalin sa daywang ka mga persona nga nagtanan ukon nag-eaong nga magpanaw sa ibang lugar rason nga nagasalig ro andang pamilya nga owa kanda it may maeain nga natabo.
Sambilog pa sa andang ginapan-aw hay base kung gin-utdan it ueo ro daywa ag gin-eubong sa nasambitan nga lugar.
Angot kara, nagapanawagan si Kapitan Rubrico sa tanan nga mga Aklanon nga kung may andang kakilea ukon kapamilya nga naduea hay magreport sa mga otoridad agud makabulig sa pag-usad it imbestigasyon.
