BALITANG Espesyal —- Ko 1999, na-diagnose si Al Lupiano, taga-Woodbridge, New Jersey, nga may una imaw nga acoustic neuroma, sangka klase it brain tumor.
Naging madinaeag-eon ro anang treatment apang nakaka experiensiya sa gihapon it side effects hasta sa makaron kapareho it sangkiri nga pagkabungoe, fatigue ag pagbuyog it ueo .
Ko 2021, na-diagnose man it acoustic neuroma ro anang asawa ag anang igmanghud apang sa owa it swerte, naging cancerous ro andang brain tumor ag owa sanda nakaeowas sa nasambit nga sakit .
Maabu ro nagakangawa sa andang pamilya kun coincidence eang baea ro pag angkon nandang tatlo it brain tumor. // bangud kara, nag-imbestiga si Lupiano.
Nag-usoy imaw sa andang lugar kun sin-o pa ro may una nga brain tumor.
Sa anang pag-usisa nakakilea imaw it 15 nga katawo sa andang lugar nga nakaangkon it brain tumor ag tanan sanda hay nagtapos sa Colonia High School.
Ko Marso 7, 2022, nag-post sa Facebook si Lupiano ag nag-usoy pa imaw it ibang estudyante sa Colonia High School nga nakaangkon it brain tumor.
Bangud sa FB post nana, naka-usoy pa imaw it masobra sa 100 nga katawo nga nag-eskwela ukon nagtrabaho sa Colonia High School nga nakaangkon it brain tumor.
Bangud kara, may pagduda nga mataas ro nuclear radiation sa Colonia High School bangud nga ko 90s hay may na-detect nga radioactive rock nga maeapit sa campus.
Sa makaron, nagpangayo it bulig ro mga awtoridad it Woodbridge sa sangka environmental engineering firm para usisaon ro campus it Colonia High School kun may nuclear radiation sa nasambit nga lugar .
