KALIBO, Aklan—Padayon ro pagdagsa it mga botante sa Pook Elementary School sa pihak it pagkaaberya it vote counting machine ukon VCM halin sa pag-umpisa it botohan kaina it agahon.
Apang, ginpasiguro ni Mr. Crispin Raymund Gerardo, tagapaghambae it Comelec Aklan nga ro andang taeatapan hay may contingency measures nga ginpahaom sa makarundaya nga sitwasyon.
Apisar nga nagkaaberya ro machine, nagapadayon gihapon ro botohan samtang ginatrouble shooting ro nasambit nga makina.
Engkaso sigon nga inde gid raya makaayad hay paga-islan eon raya it andang naka standby nga VCM.
Igasueong gihapon ro mga balota nga ginbotohan it mga botante sa atubang it mga volunteers ag watchers.
Ginduea man ni Gerardo ro kabaeaka it pumueoyo nga inde mahuyap ro andang boto bangud nga electoral board eon ro magasueong kara sa makina ag uwa eon it magaguwa nga resibo.
Mag-eowas sa nasambit nga lugar, nagkaaberya man ro VCM sa Nalook ag Briones Elementary School apang insigida man raya nga naayos ag nagapadayon ro botohan hasta alas-7:00 it gabie.
Uman nga nagpadumdom si Gerardo nga magboto gihapon sa pihak it may inde malikawan nga aberya makaron nga eleksyon kon siin ginpasiguro kara nga bantay sarado gihapon ro andang sagrado nga boto para sa andang mga nahamut-an nga kandidato.
