KALIBO, Aklan—Sa pihak it anang kapas-eawan sa uman kunta nga pagpungko bilang alkalde it Kalibo, eubus gihapon ro pagpasaeamat ni mayor Emerson Lachica sa tanan nga nagsalig ag nagsuporta sa anang kandidatura.
Raya hay matapos nga napyerde imaw ni dating Aklan 1st district sangguniang panlalawigan member ag mayor elect Juris Bautista nga nakaangkon it kabilugang boto nga 25,907.
Suno kana, kaeabanan sa mga kabaryuhan sa banwa it Kalibo hay napyerde imaw partikular eon sa ana mismong barangay nga Andagao.
Apang, uwa sigon imaw nagkueang sa hugod sa pagpangampanya kaibahan ro anang pamilya mag-eowas eon lang sa campaign fund nga aminado raya nga kinapos ro anang budget.
Ginpahayag dugang nga nasubuan imaw sa naging resulta it eleksyon kon siin nakalista raya it boto nga 18,968.
Sa pihak kara, ana gihapon nga ginpanginbulahan ro bag-ong alkalde it banwa ag handom kara nga matuman gihapon ro anang nakaline-up kunta nga proyekto sa uman nana nga pagpungko kon ginswerte kaparehas it pagpadayon sa plano nga public market, convention center ag maabong iba pa.
Sa makaron nga uwa eon imaw sa pulitika, magapokus anay raya sa anang pamilya ag ginpasiguro nga magapadayon gihapon ro anang pagpanerbisyo sa publiko.
