KALIBO, Aklan–Sobra eon nga nagakalisod ro mga operators ag drivers it mga pampublikong saeakyan angot sa sunod-sunod ng pagtaas sa presyo it produktong petrolyo eabi pa ag sa masunod nga domingo hay may naka-abang eon man nga bigtime oil price hike.
Bangud kara, nagapanawagan ro van driver nga si Rey Puod nga may biyaheng Caticlan-Kalibo vice versa sa gobyerno nga mataw-an sanda it fare increase ukon dugang nga sukot sa pamasahe.
Gin-insister nana nga makabulig it mabahoe kanda nga mga driver engkaso nga mapataasan ro pamasahe sa mga pampublikong transportasyon bilang kompensasyon sa padayun nga pagtaas it presyo it petrolyo.
Masobra sa katunga eon suno kana ro ginsaka it presyo it diesel rason nga ro andang gina-uli eon lang nga kita sa pamilya hay para eamang sa andang pagkaon ag owa eon ro para sa ibang kinahangeanon.
Gindugang pa nga owa man sanda nakabaton it fuel subsidy bangud ng gintau eamang raya sa mga public utility jeepney.
Halin sa dating 100 pesos nga pamasahe hay naging 130 pesos eon makaron.
Sa mayad nga swerte suno kana ag ginpanabaan it andang amo ro andang boundary nga halin sa dating 1,500 pesos hay naging 900 pesos eon lang.
