KALIBO, Aklan—Insigidang igapaidaeum sa inquest proceedings ukon ipa-atubang sa Aklan provincial prosecutors office it mga otoridad ro suspek nga si Mark Archie Torrefiel, 31 anyos, ro guwardiya nga pumatay sa 23-anyos nga manager-reliever it RD Pawnshop nga si Bonna Hercia Ambay kasunod it pag-abot kara sa banwa it Kalibo halin sa kampo krame para sa kasong Robbery with Homicide nga ginpasaka kontra kana.
Suno kay Atty. Benjamin Candari, Jr. lolo it biktima ag abogado it pamilya Ambay nga Huwebes nga adlaw hay ginpasaka ni Bonifacio Ambay, ama it biktima ro complaint affidavit ag natigayon eon raya nga ma-subscribe.
Sa pihak nga maabu ro naga-kwestiyon nga ham-an nga bukon it murder ro kaso, mabahoe gihapon ro pagpati ni Atty. Candari nga mabulok sa presuhan ro suspek bangud pagasiguraduhon sigon nanda nga reclusion perpetua ukon hasta nagakabuhi nga pagka-presu ro igapapanaog nga sentensiya kontra kana.
Mabug-at suno kana nga kaso ro Robbery with Intimidation and Violence Against Persons.
Dugang pa nga pagatinguhaan nanda nga indi raya makapiyansa samtang ginapamatian ro anang kaso sa korte.
Raya hay bangud sa mga mabug-at nga ebidensiya nga andang igaplastar eakip ro CCTV footage ag ro mga narekober nga items sa crime scene partikular ro 21-centimeter nga kutsilyo, posas, coin purse, tuwalya, handbag, ag uniform it security guard nga long sleeves nga puno tanan it dugo.
