KALIBO, Aklan—Mabahoe ro pagpati it Bagong Alyansang Makabayan ukon Bayan-Panay nga kon indi pagaboe-on ro buwis sa produktong petrolyo, posibleng raya ro magapatay sa ekonomiya it Pilipinas.
Suno kay Bayan-Panay provincial chairperson Ryan Bosque nga kon magapadayun ro pagtaas it produktong petrolyo hay magamahae man ro presyo it mga baeak-eon rason nga mabawasan ro mga pumueuyu nga may ikasarang nga magbakae it andang adlaw adlaw nga kinahangeanon.
Mag-eowas sigon sa excise tax, dapat man nga boe-on anay it gobyerno ro 12% value added tax ukon VAT nga ginapatong sa produktong petrolyo.
Bukon eon suno kana it hinangae ro kada domingo eon lang nga oil price hike ag bukon it basta-bastang pagpataas kundi nga puro bigtime ro increase.
Bangud sa pagkabaeaka nga maga abot eon sa P100 ro kada litro it produktong petrolyo, mabahoe nga kasoehayan sigon ro haeos P20 nga posibleng igabawas kon pagaboe-on ro buwis.
Sa pihak nga parte, suportado sigon nanda ro panawagan it sektor it transportasyon sa idaeum it PISTON-Panay nga pagpataas it pamasahe bangud nga haeos owa eon it gina uli sa andang pamilya ro mga drivers it pampublikong saeakyan.
Bukon suno kana it bastante ro fuel subsidy.
Gindugang pa nga owa man sigon it pueos ro gin aprubahan nga wage increase ukon pagpataas it sweldo bangud sa pagmahae it mga baeak-eon.
Samtang, welcome development man sigon ro pahayag it negosyanteng si Ramon Ang haum raya nga uman nga ibaligya sa gobyerno ro Petron.
Kon uman sigon nga makaangkon it government player hay maduea ro monopolyo ag makita ro aktwal nga presyo it produktong petrolyo.
Ginsuhestiyon man it grupo nga tun-an eon it gobyerno ro proposisyon nga sanda ro magpakyaw it bulto it oil products nga iga distribute sa mga private players sa nasyon agud nga malikawan ro over pricing.
