Matapos nga mamitlang sa unang state of the nation address ukon SONA ni pangueong Ferdinand “Bongbong” Marcos, Jr., ginaeauman nga mataw-an eon it katumanan ro uman nga pagbuhi ag operasyon it tren sa idaeum it Panay Railways Incorporated ukon PRI.
Suno kay Capt. Cesar Capillan, chief operating officer it PRI nga malipayon sanda sa naging desisyon ni Marcos.
Ginpahayag dugang nga ro revival it railway construction project sa Panay hay na-mention man dati sa SONA ni dating pangueong Rodrigo Duterte.
Kapin sa lima hasta pitong Chinese companies suno kana ro nagpirma kanda it memorandum of understanding para sa nasambit nga proyekto, apang sa indi masayuran nga rason hay owa nadayun.
Nagapati sic apt. capillan nga ro uman nga pagbuhi sa nasambit nga klase it transportasyon hay siguradong makatau it dugang nga trabaho ag oportunidad sa isla it panay.
Sa makaron hay may limang kompaniya, kun sa siin pila sa mga raya hay mga foreign investors ro nagpadaea eon man it letter of interest sa anang taeatapan para sa rehabilitasyon it railway.
Sa oras nga mapursige, ro proyekto hay igapaidaeaum sa Public–private partnership ukon PPP ukon Build, Operate and Transfer.
Pagataw-an it atensyon sa first phase it proyekto ro pag-ayos sa lumang mga riles it tren halin sa Iloilo City paagto sa Roxas City ag ro ikaywa hay ro pagbutang it railway halin sa Roxas City paagto sa Caticlan nga pagasundan it Caticlan paagto san jose antique ag ro ulihi ag ika-ap-at nga phase hay san jose pabalik sa Iloilo City ukon magalibot sa bilog nga panay.
Ginaeauman nga magiging problema kara hay ro pagbakae it mga property nga paga-agyan it rota.
Sa pinaka-ulihi nga feasibility study, paga-abuton it 1.5 billion dollars ro pagagastuson sa unang phase pa eamang it proyekto ag ginatantiya nga magabuhay it tatlo hasta limang dag-on .
