KALIBO, Aklan–Ginakalipay it Aklan National High School for Arts and Trades (ANHSAT) ro maayos nga daeagan it ikaywang adlaw it pagbukas it klase para sa School Year 2022-2023.
Ginpahayag ni Mr. Richard Flores, Secondary School Principal I it ANHSAT nga limited face-to-face classes sa gihapon ro andang ginapatuman.
May ginpatuman sigon sanda nga flag raising ceremony kahapon adlaw it Lunes ag magabuhay hasta it Huwebes para mataw-an it kahigayunan ro mga estudyante nga ma-eksperyensyahan ro pilang hitabo sa eskwelahan kadungan it short orientation.
Agud nga ma-akomodar ro tanan nga estudyante, gintunga sigon nanda raya sa ap-at nga batch.
Naga-abot sa kabilugan nga 58 section ro may una ro eskwelahan kung siin 37 eamang ro andang classroom.
Antes sanda nagpatigayun it set A ag set B hay gintunga anay nanda sa daywa ro mga estudyante.
Ro unang set hay ginakaeakipan it Grades 7, 9 ag 11 nga may schedule nga Lunes, Merkules ag Biyernes.
Sa pihak kara, sigidas sigon ro andang pagpahaum ag pagplano para sa nakataeana nga full implementation it face-to-face classes sa buean it Nobyembre.
Aminado si Flores nga ro kakueangan it classroom ro nagapangunang problema nanda sa makaron.
Ginpasiguro man kara nga hugut nanda nga ginasunod ro health and safety protocols kung siin antes magsueod ro mga estudyante kinahang-ean anay nanda nga mag-agi sa triage para sa pagbuoe it body temperature, magsueat sa log book ag diretso sa hand washing area.
Kamana man nga ro tanan nga classroom hay may naka-stanby nga thermal scanner, disinfectant, alcohol ag face mask.
