Kasunod it abiso it mga maeagkong kumpanya it langis, nagpatuman man it price increase sa produktong petrolyo ro iba pang gasoline station.
Suno kay Jebel Gonzales, OIC it Petro Gazz gasoline station sa may bahin it kanto it Toting Reyes St., Kalibo nga kapin sa an-om nga piso man ro gintaas sa andang diesel.
Ginpaathag nga haeos tanan nga gasolinahan hay may pagsaka sa presyo it andang produkto ag eauman eon nga kada adlaw it Martes hay may baeayluhan sa presyo it langis.
Ro andang supply hay nagahalin sa syudad it Iloilo kon siin uwa man sanda it mahimo kon mag-abiso ro andang kumpanya nga may price increase it produkto sandig sa nagkaeain-eain nga rason.
Maabo man suno kana nga mga drivers and operators it nagkaeain-eain nga behikulo ro nagareklamo apang ro nasambit nga produkto hay kaibahan eon sa andang pangitan-an sa pang-adlaw adlaw nga pagpangabuhi.
