Kasunod sa pagkatumod sa identity it tatlong ka mga kaeaeakin-in nga may kahimuan sa bandalismo sa comfort room sa may Veterans Avenue, Kalibo hay uman nga napinturahan ro nahigkuan nga pader.
Raya hay kasunod man it promisa it tatlo nga nagapang-edaron it 18, 23 ag 25 anyos nga andang limpyuhan ro andang higko nga ginkriar.
Suno kay Punong Barangay Neil Candelario it Poblacion, Kalibo nga ro nasambit nga mga persona nga residente it Kalibo samtang ro daywa hay taga munisipalidad it Banga mismo ro nagpintura.
Ginklaro it kapitan nga ginboe-an ro mga raya it litrato samtang nagatrabaho ag ginpost sa social media bukon it para pakahuy-an sanda kundi ipakita sa tanan nga ro saea nga hinimuan hay may kaakibat nga penalidad eabi eon ag propyedad it gobyerno ro andang ginhalitan.
Nauna eon nga ginpatawag ni Kalibo mayor Juris Sucro ro tatlo kadungan sa andang pagpatigayon it public apology kon siin sa pihak it kaakig it alkalde hay matawhay gihapon nana nga gin-atubang ro mga raya ag gintaw-an it konsiderasyon bangud nga ro daywa kanda hay mga estudyante pa.
Madumduman nga pinaagi sa mga cctv footage hay nakilaea ro tatlo nga sanda ro may kahimuan sa nasambit nga bandalismo.
