Ginpaathag ni Atty. Harry Sucgang, dating politician sa Aklan nga ro kongreso eamang ro may gahum nga makapapostponed it barangay ag sangguniang kabataan eleksyon pinaagi sa laye nga andang igapasa.
Maskin ro presidente it Pilipinas suno kana hay inde makapapostponed it election kundi ro kongreso eamang.
Ginpaathag dugang nga ro otoridad it commission on election ukon comelec hay sanda ro nagaregulate it election ag pwede ro komisyon magdeklara it failure of election engkaso nga may nag-eontad nga violence nga delikado para sa pagpatigayon it botohan.
Apang sandig sa laye hay dapat kada tatlong dag-on hay may regular election nga ginapatigayon sa nasyon.
Nauna eon nga ginpasiguro ni House Majority Leader Mannix Dalipe nga pursigido ro liderato it Kamara nga maaprubahan sa ikatlong pagbasa ro hagna nga maipaiway ro barangay ag sanguniang kabataan elections (BSKE) antes mag-break ro Kongreso sa October 1.
Suno kay Dalipe, suportado it House speaker ro pagpaiway sa eleksyon agud taw-an it kahigayunan ro Commission on Elections (Comelec) ag mga lokal nga gobyerno nag makapahaom para sa mas maaayos ag malimpyo nga eleksyon kamana man mai-adjust ro honoraria it mga poll worker.
Ro nasambitang proposisyon hay consolidation it kapin sa 43 nga magkaparehas nga House bills.
