KALIBO, Aklan–Sigidas eon ro pagpahaum sa mga sementeryo sa banwa it Kalibo para sa maabot nga Undas ukon Pista Minatay.
Suno kay Ulysis Cipriano, haeos 22 anyos eon nga sepulturero sa Old Roman Catholic Cemetery ag Medalla Milagrosa Cemetery nga haum sanda nga mag-alalay sa mga kapamilya nga gustong magpalimpyo, magpapintura ag magpa-renovate sa nitso it andang mga mahae sa kabuhi.
Kadungan kara ro paglaygay nga himuson it maayos ro andang mga basura agud nga mapabilin ro kalimpyo sa lugar.
Nagatau sigon sanda it garbage bag sa mga nagakinahangean.
Sa pihak kara, maabu eon suno kana ro mga naga-agto sa sementeryo makaron pa eamang kun sa siin ginaeauman nanda nga magadagsa pa ro mga tawo nga magabisita sa andang mga mahae sa kabuhi sa Nobyembre 1 ag 2.
Kaibahan suno kana sa mga bawae nga daehon sa sueod it sementeryo sa Undas hay ro mga aeak, flammable materials, mga kutsilyo ag iba pa
