KALIBO, Aklan—Sa pihak nga ginapasugtan eon ro face to face nga pagbisita sa mga sementeryo sa maabot nga pista minatay, nag apela ro barangay council it Kalibo nga likawan nga makipagdueutdutan sa maabu nga mga tawo.
Suno kay punong barangay Neil Candelario it Poblacion, Kalibo nga mas mayad nga mag-temprano sa pagbisita sa puntod it mga mahae sa kabuhi nga nagtaliwan eon.
Ginpamilit kara nga nagapabilin ro paeag it COVID 19 eabi pa ag may nagatuhaw eon man nga mga bag-ong variants it sakit.
Ginpahayag dugang nga mas mayad sa gihapon nga magsunod sa minimum public health standards ag ro pagsuksok it face masks maskin nga optional eon raya outdoors.
Samtang, magapadaea suno kana imaw it mga tawuhan it peacekeeping action team agud nga mag-augment sa iba pang barangay sa pagpatuman it protocols sa mga sementeryo nga andang nasakupan.
Sa pihak nga parte, ginabawaean ro mga nagabisita sa sementeryo nga magdaea it mga makahieilong nga ilimnon, mataeum nga hinganiban, pagpatukar it mga mabaskog nga sound ag iba pa.
Magatukod man sigon ro kalibo municipal police station it police assistance desks sa tanan nga mga sementaryo.
