KALIBO, Aklan—Sangka dumueuong nga nagapanag-iya it dormitoryo sa Melgar Road, Barangay Estancia, Kalibo ro nagpaabot it reklamo sa Bombo Radyo Kalibo matapos nga ro alagang manok it anang mga kaeapitbaeay hay nagatuga it disturbo sa anang negosyo.
Suno sa tagreklamo nga si Paulo Laurenza, tubong United Kingdom ag presenteng naga-istar sa nasambit nga lugar mag-eowas sa gina alegar nga sangkaterbang inugbueang nga manok nga gina-alagaan it anang mga kaeapitbaeay nga nagatuga it sangag sa pagtukturook it mga raya hay ginakaugtan man nana ro mga nagadap-ong ag nagahampang it basketball sa anang palibot.
Makabig suno kana nga illegal ro mga makarondaya nga aktibidad sa sangka residential area rason nga gusto nana nga mapapundo.
Ro insidente hay nagatuga man kana it stress ag pagkaduea it income.
Samtang, gindugang pa it tag-ana it Laurenza residences and dormitory nga nakaangkon man it isyu sa anang seguridad matapos nga makabaton it mga pagpamaeag, kun sa siin haeos tatlong dag-on eon sigon nga gina-einapog it owa nakilaea nga mga indibidwal ro anang building.
Sa pihak nga parte, nangawa man sigon imaw kon ham-an nga masyadong mahinay mag-aksyon ro barangay council, Kalibo municipal police station ag iba pang natungdan nga ahensiya it gobyerno sa anang mga reklamo sa pihak nga legal ro anang pagtukod it building ag negosyo sa nasambit nga lugar.
Maeain man ro anang buot bangud nga kat ginreklamo imaw it mga kaeapitbaeay matapos nga nagkaproblema ag ginbuksan nana ro anang septic tank hay imaw pa ro ginpaeag nga pagapapanaugan it multa.
Nasayuran nga ro nasambit nga foreigner hay haeos 20 anyos eon nga naga-istar sa nasyon ag limang dag-on sa nasambit nga lugar.
Nakapangasawa raya it Akeanon, apang nagbueag eon sanda nga daywa.
