Eubos nga ginkalipay it sangka Aklanon young leader matapos nga mapilian bilang sambilog sa limang representante it nasyon para sa Young Southeast Asian Leaders Initiative (YSEALI) sa Estados Unidos.
Suno kay Mr. John Marlou Salido, Executive Director it Project Kalibo Inc. nga handom ag dumot nana nga mapaeakip sa fellowship program it US State Department.
Gin-istorya man kara nga tatlong beses imaw nga naghana nga mag-apply rason nga eubos ro anang pagpasaeamat matapos nga imaw hay mapilian.
Aminado si Salido nga owa naging madali ro anang gin-agyan bangud maabu pang dapat maagyan antes makasueod sa programa.
Suno kana, ro YSEALI hay importanteng programa it U.S. Department of State’s Bureau of Educational and Cultural Affairs (ECA), kung siin, ginataw-an it kahigayunan nga maka-eskwela sa Amerika it libre ro mga napiling representante it kada nasyon nga miyembro it Association of Southeast Asian Nations (ASEAN).
Ro programa hay ginlunsar ko 2013 agud nga pabaskugon ro leadership development sa bilog nga ASEAN.
Halin Setyembre 17 hasta Oktobre 21, 2022, nagpaidaeom sanda sa limang dominggong leadership training kaangot sa Social Entrepreneurship and Economic Development sa University of Connecticut.
Ginpromisa man it 25-anyos nga young leader nga inisgida kara nga paga-umpisahan ro mga nabilog nga proyekto ag igapakigbahin ro anang mga natun-an sa Amerika.
Si Salido hay sambilog sa lima eamang nga napiling maging representante it Pilipinas ag nakaibahan sa 41 young leaders halin sa 11 nasyon sa Southeast Asia para sa Fall 2022 cohort
