KALIBO, Aklan—Malipayon ag bugaeon ro lokal nga gobyerno it Kalibo sa nabaton nga pasidungog halin sa Department of Trade and Industry ukon DTI nga nagakilaea sa kahauman sa pagbaton it investors sa ginpatigayon nga Cities/Municipalities Competitive Index ukon CMCI.
Suno kay Kalibo Vice Mayor Cynthia Dela Cruz nga nasorpresa sigon sanda sa nabaton nga award.
Ro award hay base sa survey nga ginapatigayon kada dag-on angot sa productivity it sangka lugar ukon paalin nga ginagamit ro resources it kada munisipalidad ukon siyudad agud nga makahimo it mayad nga output ag mapa-ayos ro daeagan it pagpangabuhi it mga pumueuyu.
Naging mabahoe nga puntos suno kana ro pagiging gateway it Kalibo paagto sa sikat nga isla it Boracay, pag angkon it international airport ag aeagyan it mga pasahero nga sakay it RoRo vessel.
Masobra sa 100 nga munisipalidad ag siyudad ro gin-survey para sa nasambit nga award.
Sa pihak nga parte, gindugang pa ni Dela Cruz nga gindeklara man ro Kalibo bilang Most Competitive Municipality para sa 1st and 2nd Class Municipality sa bilog nga Western Visayas sa 6th Regional Cities and Municipalities Competitiveness Index Awards for Competitive LGUs.
Naging rank 1 sigon ro LGU-Kalibo sa most competitive municipality-economic dynamism pillar bangud sa income it banwa nga kwalipikado eon agud nga maging sangka siyudad kun sa siin ro kueang eon lang hay ro numero it populasyon ag land area.
Sa pangkabilugan sa national level, rank 4 ro Kalibo sa economic dynamism.
Samtang, rank 3 ro banwa sa most competitive municipality sa infrastructure, kamana man sa innovation.
Bilang selebrasyon sa nabaton nga award, ginpasidunggan nanda kaina ro mga department heads nga sa likod it nasambit nga kaeag-an.
Mag-eowas kara, ginkilaea man nanda ro naging kontribusyon it dating administrasyon ni mayor Emerson Lachica.
