Mabahoe ro pagpati it mga Espanyol nga makasueod sa finals ro andang national football team sa nagapadayun nga FIFA World Cup 2022 sa Qatar.
Suno kay Bombo International Correspondent Maria Edzel Lamparero Lopez it Madrid, Spain nga todo ro suporta it mga football fan sa andang koponan.
Kumpiyansa man sanda nga mapierdi it Spain ro Morocco sa andang hampang sa Disyembre 6.
Agud nga ipakita ro andang suporta, masami sigon nga nagapa-reserve sa mga restaurant ro mga pumueoyo agud nga magtan-aw it hampang.
Nasayuran nga ulihing nagdaog sa World Cup ro nasyon ko 2010 kung siin nagdeklara it holiday ro andang gobyerno ag nakaangkon it magarbong parada.
Ro football hay sambilog sa pinaka-popular nga sports sa Espanya bangud sa elementarya pa eamang hay nagapaidaeom eon sa training ro mga unga nga may interes sa paghampang.
