KALIBO, Aklan–Eubos ro kalipay nga nabatyagan it ap-at ka mga registered Criminologist matapos nga makapasar sa kakatapos eamang nga eksaminasyon.
Suno kay Angelica I. Angel nga sobra ro anang pagpasaeamat matapos nga magbunga ro tanan nga kalisod nga gin-agyan nanda samtang naga-review.
Una sigon imaw nga gin-congratulate it anang amiga.
Ko una hay indi pa imaw magpati hasta sa makita eon kara ro listahan it mga nakapasar sa licensure exam.
Samtang, ginakabig man ni Jennyfer Rello nga sangka manami nga regalo para sa anang kaadlawan ko Enero 20 ro pagguwa it resulta it eksaminasyon.
Nag-off pa sigon imaw it internet connection agud mapakalma ro anang kaugalingon.
Apang, sa owa magbuhay hay gintawagan imaw it anang magueang para ipaabot ro manami nga balita.
Sa pihak nga parte, haeos indi man makapati si Kent V. Sevilla nga sambilog imaw sa maswerteng nakapasar sa exam.
Suno kana, naging worth it tanan nga sakripisyo ag pagtinguha nana sa sueod it ap-at nga dag-on sa kolehiyo kamana man ro daywang buean ag tunga nga pagsunod it kilay sa pagreview.
May kaangtanan kara, nagtumbo-tumbo man sa kasadya si Christine Villaco kaibahan ro anang pamilya bangud sa panibag-ong milestone nga anang naangkon.
Aminado si Villaco nga grabe ro kalisod ro andang gin-agyan eabi eon sa tyempo it pag-review kung siin naging mabahoe nga hangkat kana ro pagpueaw.
Dugang pa kara nga kinahang-ean gid nga itao ro bilog nga atensyon agud nga ma-absorb ro tanan nga leksyon.
