KALIBO, Aklan—Ginpaabot ni Aklan first district board member Nemesio Neron sa plenaryo it Sangguniang Panlalawigan it Aklan ro anang kabaeaka angot sa nakaabot nga impormasyon kana nga maabong ayam makaron ro nagamasakit ag nagabang-aw nga eubus nga mapeligro sa mga pumueoyo bangud sa daea nanda nga rabies.
Bangud kara, ginpakamayad nga ihinyo sa plenaryo nga makaangkon it inquiry pinaagi man sa pag-imbita sa mga natungdan nga ahensya it gobyerno partikular sa Office of the Provincial Veterinarian agud nga maipaabot ro nasambit nga impormasyon.
Ginpahayag dugang ni Neron nga maabo eon imaw nga nasayuran nga may nagamasakit nga ayam ag madali sanda mamatay ag ginatan-aw nga base may pandemya man nga nagaigo makaron sa nasambit nga sapat.
Gusto sigon nana masayuran kon anu ro estado makaron angot kara agud nga maaksyunan eagi, mataw-an it pondo ag makaangkon it massive anti-rabies injection sa oras nga matala kay raya sa plenaryo.
Nasayuran nga maabong gala makaron nga ayam eabi eon sa gabie nga nagiging rason it pila ka mga aksidente sa daeanon.
