KALIBO, Aklan — Uman nga nagpanawagan ro lokal nga gobyerno it kalibo pinaagi sa pamunuan it Municipal Solid Waste Management Board sa tanan nga mga residente ag nagapanag-iya it mga establisimento nga ayuson ro pagpilak it basura ag buligan sanda sa kampanya nga ‘No Segregation, No Collection’ policy nga magiging epektibo sa Oktubre 30 it makaron nga dag-on.
Suno kay Ms. Adorada Reynaldo, Public Services Officer II nga pinaagi sa bulig it iba pang natungdan nga ahensiya it gobyerno, tuyo kara nga mag-eowas nga maging maayos ro pagpilak it basura hay maprotektahan man ro palibot ag ikamayad nga eawas it mga Kalibonhon.
Raya hay bilang pagsunod man sa Republic Act 9003.
Masako sigon makaron ro andang mga enforcer sa pag disseminate it impormasyon sa mga establisimento ag mga kabaeayan agud nga maeubtan it husto ro igapatuman nga patakaran.
Makaangkon suno kana it bag-o ag separado nga schedule sa paghakot it biodegradable, recyclable, ag residual waste nga sakop it andang service collection routes.
Kada Lunes, Miyerkules ag Biyernes, pagakolektahon ro mga basura nga biodegradable ukon nabubulok ; Martes, Huwebes ag Sabado ro pagkolekta sa mga hindi nabubulok, eakip ro recyclable ag residual waste ag kada Domingo ro pagakolektahon hay ro special waste ukon ro mga basura nga may halo nga kemikal, mga mataeiwis ag mapueos-on nga bagay.
Laygay pa nana nga ro mga sanitary napkin ag mga diapers hay i-eubong sa eugta.
Nagpaandam pa imaw nga ro mga indi magsunod sa polisiya hay indi pagakolektahon ro andang basura ag pagapapanaugan it multa nga 1,440 pesos.
Ro unang domingo sigon it pormal nga implementasyon kara hay magaserbi anay nga dry-run.
Dugang pa ni Reynaldo nga ro nasambit nga tikang it munisipyo hay bilang pagpahaum sa pagpasarado ag rehabilitasyon it dumpsite sa Brgy. Bachaw Sur, Kalibo.
