KALIBO, Aklan—Ginkumpirma ni punong barangay Neil Candelario it Poblacion, Kalibo nga natapos eon it Municipal Planning and Development Office it lokal nga gobyerno it Kalibo ro geotagging para sa igapatuman nga proyekto partikular sa C. Laserna St. Kalibo.
Suno kana nga nagapatigayon eon lang makaron it evaluation sa ginpatigayon nga geotagging para sa epektibong pagpatuman it planning, budgeting, project monitoring, ag contract management process.
Apang nagpanindugan si kapitan Candelario nga indi paga umpisahan ro road network ag pagpaeapad it mga karsada samtang owa it maayos nga masayluhan ro mga apektadong residente partikular sa mga naga-istar maeapit sa revetment wall.
Aminado imaw nga maabu nga mga residente ro madaeasa sa proyekto.
Owa sigon sanda it mahimo kon imandu it gobyerno ro pagpatuman it proyekto nga para man sa kamaeayran it tanan.
Sa makaron hay nakikipag angot eon sigon ro LGU kalibo sa mga purok leaders ag coordinators agud nga sanda ro magapaathag sa andang mga nasakupan.
Nasayuran nga maghalin sa revetment wall hay makaangkon it kapin sa 40 meters nga setback para sa paga-obrahon nga road network ukon karsada sa lugar.
Iga demolish kara ro mga maapektuhan nga panimaeay ag ro mga residente hay igasaylo sa gintaeana nga relocation site.
