POLICE Report — Nakibot ro mangingisda ag mga residente sa andang nasaksihan matapos mahueog ro butkon it sangka tawo halin sa tiyan it pating nga nadakpan ag ginkatay sa banwa it Araceli.
Sa ginpaguwa nga report it Palawan Police Provincial Office, nag-agto sa andang taeatapan ro sangka mangingisda para ipahisayod ro angot sa nakita nga butkon it tawo nga nabo-oe sa sueod it tiyan it pating nga andang nadakpan.
Suno sa mangingisda, samtang sa katung-anan sanda it eawod nga sakop it Barangay Calandagan, Araceli maeapit sa isla it Canaron ag nagapangisda gamit ro hook kat madakpan ro pating nga may bug-at nga 20-kilo.
Kat ginkatay eon nanda ro nadakpan nga pating para ibaligya sa mga nagahueat nga residente, gulpi eamang nga nahueog ro butkon it sangka tawo nga may 12 pulgada ro haba.
Insigidang gin-eubong it mangingisda ro butkon it tawo agud nga indi eon raya mag-eangoy pa.
Nag-agto man ro mga tawuhan it Araceli Municipal Police Station ag Municipal Disaster Risk Reduction and Management Office sa nasambit nga barangay agud nga boe-an raya it fingerprint apang nagaka-agnas eon ro nasambit nga butkon.
Samtang, nagpaguwa it opisyal nga pahayag ro Sangguniang Barangay it Calandagan nga nagpaathag nga owa nanda ginpaguwa sa publiko ro insidente agud nga malikawan ro pagtaeang ag agud nga mataw-an it daean ro mga awtoridad para sa tamang disposisyon.
