BORACAY Island — May person of interest eon ro Malay Municipal Police Station sa pumatay ag posibleng naghimueos sa turistang Slovakian, kun sa siin nakita ro anang bangkay nga una eon sa state of decomposition sa sangka abandonadong kapilya sa Boracay.
Ginpahayag ni Police Lieutenant Colonel Mar Joseph Ravelo, hepe it Malay MPS nga naka-ibahan it biktima ro nasambit nga mga POI.
Suno kana nga may una sanda nga daywa ukon masobra pa nga persons of interest partikular ro mga tawo nga ulihi nana nga naka-ibahan antes nga gin-report nga missing.
Ginasugid nga sangka foreign national ag iba pang mga local ro naispatan nga nag-agto sa lugar kon sa siin nakita ro bangkay .
Madumduman nga napabalita nga naduea ro 23-anyos nga biktimang si Michaela Michova ko Marso 10.
Daywang adlaw ro nakataliwan hay nakita ro anang bangkay sa sangka abandonadong kapilya nga owa it suksok nga pang-idaeum.
Sa makaron hay ginahueat pa ro resulta it eksaminasyon it bangkay halin sa forensic unit agud nga matumod ro naging rason it anang pagkamatay ag kon minatuod nga raya hay ginhimuslan.
Ginasugid nga masyadong friendly ro biktima ag gin-abuso ro anang kabuot it mga tawo nga anang naka-ibahan.
Gina-usisa man it kapulisan ro CCTV footage nga posibleng makabulig sa imbestigasyon.
Ginpahayag dugang nga masyadong adventurous ro turista kun sa siin mahilig raya nga mag-agto sa mga lugar nga owa it tawo kamana man nga nakasanayan sigon nana nga mag agto sa mga luma nga simbahan .
Gindugang pa nga ro crime scene hay owa masyadong gina patrolyahan it pulis bangud nga masyadong magamo ag sa nabukid nga parte it isla.
Sa sangka CCTV footage, nakita nga daywang beses raya nga nag agto sa nasambit nga lugar ag nagatikang nga naga-isaeahanon eamang.
Sa pihak it natabu, ginpasiguro it mga awtoridad nga nagapabilin nga eowas nga magpamasyar sa Boracay ag sa bilog nga probinsiya it aklan.
