Altavas, Aklan—Patay ro driver it motorsiklo samtang naninahan ro anang daywang ka angkas matapos nga maimbolbar sa aksidente nga nag-eontad bandang alas-3:20, dominggo it hapon sa national highway nga sakop it Brgy. Lupo sa banwa it Altavas.
Ginpahayag ni PLt. Josette Damasco, deputy chief of police it Altavas Municipal Police Station nga nag-overshoot ro motorsiklo nga ginamaneho it 45-anyos nga eaeaki angkas ro daywang iba pa nga puro mga residente it Jamindan, Capiz rason nga sumunggab sa kotse nga ginamaneho it 28-anyos nga babaye nga residente it Brgy. Catmon, Altavas.
Sa inisyal nga imbestigasyon it pulisya, nadiskubrehan sigon it mga responders nga una sa idaeom it impluwensya it aeak ro mga sakay it motorsiklo nga gulping sumunggab sa nagapasaka nga kotse kon sa siin pati ro linya it saeakyan ay andang naagaw.
Bangud sa mabaskog nga impact it pagkasunggab hay inapok ro mga sakay it motorsiklo nga gintunaan it fatal nga lastro sa ueo it driver nga nagresulta sa anang hinali nga kamatayon samtang padayon nga ginabueong sa ospital ro daywang iba pa matapos nga makaangkon it kasakitan ag iba pang lastro sa kaeawasan.
Nasayuran nga paadto kunta sa Altavas District Hospital ro mga sakay it motorsiklo bangud nga sambilog kanda hay ginahapo.
Ro aksidente hay padayon pang ginaimbestigahan it Altavas Municipal Police Station para sa nagakaigong disposisyon.
