POLICE Report — Tadtad it pagbuno sa nagkaeain-eain nga parte it anang eawas ro sangka 27-anyos nga daeaga nga tinder it baealigyaan it shawarma sa Quezon City.
Nakilaea ro biktimang si alyas Lyka, 27, daeaga, Turks Service Crew, ag naga-istar sa Bgry. San Jose, Del Monte, Quezon City.
Nakapaeagyo man ro ginasugid nga suspek nga si alyas Eduard, 22, dating service crew it nasambit nga baealigyaan ag naga-istar sa Nitang Gulod Ave., Novaliches, sa nasambit man nga siyudad.
Sa report it Criminal Investigation and Detection Unit it Quezon City Police District (CIDU-QCPD), bandang alas-8:55 it agahon kat madiskubre ro bangkay it biktima sa sueod it andang pwesto sa kanto it Tandang Sora Ave. ag Quirino Highway, Brgy Sangandaan, Quezon City.
Base sa imbestigasyon, nag-abot ro katrabaho it biktima nga si alyas Pastoral agud nga umpisahan ro anang opening shift duty, kat mataeupangdan nana nga bukas gihapon ro baealigyaan.
Pagsueod nana sa pwesto hay eubus ro anang pagkakibot kat makita ro duguang biktima nga nagahamyangon sa saeog sa kusina ag owa eon it kabuhi.
Nag-abot ro SOCO team ag nabo-oe sa crime scene ro sangka brown wallet nga may sueod nga daywang identification card nga may pangaean ni Eduado, pilang ATM card ag cash money nga nagabalor it P1,000.00, daywang kitchen knives, sangka cellular phone, brown-colored t-shirt, ag ID it biktima.
Nagatuhaw sa cursory examination nga nag-angkon ro biktima it maabu nga igo it pagbuno sa eawas.
Samtang, ro manager it Turks nga si alyas Baby hay nagtau it access sa CCTV footage nga naka-link sa anang mobile phone.
Kat usisaon it mga pulis ro footage, nakitang bandang alas-9:02 it gabi-i, nagsueod ro suspek sa baealigyaan samtang sa sueod ro biktima.
Pilit nga gin-guyod it suspek ro biktima paagto sa kusina ag idtu hay makapilang beses nga ginbuno sa nagkaeain-eain nga parte it eawas ag pagkatapos hay nagpaeagyo.
Padayun pa ro imbestigasyon sa motibo it natabu nga krimen.
