Nagpromisa ro Pilipinas ng magapadaea it mas maabo nga Pilipinong peacekeepers para makabulig sa pagsueong it mas euwas ag malinong nga kalibutan.
Raya ro pahayag ni Department of National Defense (DND) Secretary Gilberto Teodoro sa UN Peacekeeping Ministerial Meeting sa Berlin, Germany, nga gintambungan it masobra 150 delegasyon halin sa makaeain-eain nga nasyon.
Suno kay Teodoro, sangka Light Infantry Battalion halin sa Armed Forces of the Philippines ag sangka Formed Police Unit ro igapadaea sa idaeom it UN Peacekeeping Capability Readiness System.
Magapadayon man ro deployment it Military Observers ag Individual Police Officers para suportahan ro UN Missions sa nagkaeain-eain nga parte it kalibutan.
Dugang pa it DND, kaibahan sa mga bag-ong promisa it Pilipinas ro pagpadaea it Quick Reaction Force Company, Military Construction Engineering Company, ag UN-certified Military Mobile Training Teams para mapahusay ro kapasidad it mga peacekeepers sa pagsabat sa mga hangkat.
Plano man it nasyon nga mag-host it UN Triangular Partnership Programme Training Courses para sa ASEAN region halin 2029 hasta 2030, ag ro 2025 ASEAN Peacekeeping Staff Exercise sa Setyembre.
Ginsiguro it Pilipinas ro padayon nga suporta kara sa UN peacekeeping operations bilang parte it pangkalibutanong handum para sa kapayapaan.
