KALIBO, Aklan — Nagapati si Atty. Axel Gonzales, sangka political analyst sa Aklan nga kapin sa 80 porsiyento it gabinete ni Pangueong Ferdinand Marcos Jr., nga nagsumite it courtesy resignation bilang pagsunod sa anang mandu hay magapabilin ag makaangkon eamang it rigodon sa andang mga ginabuytan nga pwesto.
Suno kana nga normal eamang ag prerogative it pangueo ro pagpatigayon it reorganisasyon sa anang gabinete.
Ro mandu nga courtesy resignation hay sangka face saving mechanism sigon agud nga indi mapahuya ro gusto nana nga mapahalin sa anang gabinite.
Ginapakita sigon it nasambit nga tikang it pangueo ro determinasyon it administrasyon nga ibutang ro mga angay ag bagay nga tawo sa tamang posisyon.
Dugang pa nana nga ro reorganisasyon hay nagabukas it panibag-ong kahigayunan para sa mas mayad nga pagdumaea ag mas mataas nga kumpiyansa it publiko.
Nagnaba suno kana ro approval rating it pangueo bangud nga antes ro midterm election ko Mayo 12 hay may ginpasaka nga impeachment trial kontra kay Vice President Sara Duterte kamana man nga gin-aresto ro anang ama nga si dating President Rodrigo Duterte nga nakakulong eon makaron sa the Netherlands rason nga ro simpatiya it publiko hay naagto sa mga Duterte kun sa siin ro mga kandidato it administrasyon hay naapektuhan.
