Kritikal ro kondisyon it sangka eaeaki matapos nga ginbuhusan it gasolina ag ginsindihan it sangka mister nga gina-alegar nga nagselos sa Barangay Pitogo sa Taguig City.
Nag-angkon ro 28-anyos nga biktima it 3rd degree burns sa nagkaeain-eain nga parte it eawas ag itsura.
Suno sa Taguig City Police Station, natabu ro insidente bandang alas-10:22 it agahon.
Mag-eowas sa biktima hay nadaeahig man ro sangka babaye nga naga-eaba.
Base sa bo-oe it Closed-circuit television (CCTV), antes ro krimen hay makita ro pag-abot it suspek sa sangka eskinita sa nasambit nga barangay kun sa siin ginpaeapitan kara ro biktima samtang naga-cellphone.
Sa owa nagbuhay hay gulpi eamang nga nagtuhaw ro kaeayo ag nagdaeaeagan ro mga tawo matapos buhusan it suspek it gas ro biktima ag ginsindihan it lighter.
Ro suspek hay nakita sa video nga naabot man it kaeayo samtang nagapaeagyo.
Sa makaron hay padayun pa nga ginatugis it mga awtoridad ro suspek.
Suno sa ina it biktima, ginaselosan it suspek ro anang unga. Dati eon sigon nga nagpaandam ro suspek sa biktima ag gina-abangan pa raya hasta sa anang trabaho.
Samtang, ginpahayag man ni Barangay Chairman Ives Ebrada, nauna eon nga nakaangkon it settlement ro magtimbang nga parte kun sa siin nag-sorry pa ro suspek sa mga ginhimo nga pagpamaeag sa biktima.
May gin-issue eon man sigon sanda it barangay protection order kontra sa suspek bangud sa gina-alegar nga pagpanakit, verbal abuse, ag psychological abuse sa anang asawa.
